தசமபாகம்

  

தசமபாகம்

தகப்பன் மரித்தால் தகப்பனுடைய சொத்து அனைத்தும் அவருடைய பிள்ளைகளுக்குத்தானே சொந்தமாகும்; அதைப்போலவே, பிள்ளை மரித்துவிட்டால்,  சொத்துக்கள் அனைத்தும் தகப்பன் வசம்தானே இருக்கும்; இதைத்தான், நம்முடைய பாவங்களுக்காகத் தம்மைத்தாமே ஒப்புக்கொடுத்தார் (கலா 1:4) என்றும், தம்முடைய சொந்தக்குமாரனென்றும் பாராமல் நம்மெல்லாருக்காகவும் அவரை ஒப்புக்கொடுத்தவர், அவரோடேகூட மற்ற எல்லாவற்றையும் நமக்கு அருளாதிருப்பதெப்படி? (ரோம 8:32) என்ற வசனம் நமக்குச் சுட்டிக்காட்டுகின்றது.

இதே சூத்திரம்தான், இயேசு கிறிஸ்துவை சொந்த இரட்சகராக ஏற்றுக்கொண்டு, பிதாவின் பிள்ளைகளானோர் மேலும் பொருந்துகின்றது. மேலும் பிதாவின் மகிமையினாலே கிறிஸ்து மரித்தோரிலிருந்து எழுப்பப்பட்டதுபோல, நாமும் புதிதான ஜீவனுள்ளவர்களாய் நடந்துகொள்ளும்படிக்கு, அவருடைய மரணத்திற்குள்ளாக்கும் ஞானஸ்நானத்தினாலே கிறிஸ்துவுடனேகூட அடக்கம்பண்ணப்பட்டோம் (ரோம 6:4); இப்படி நாம் அடக்கம்பண்ணப்பட்டபோது, நாமும், நம்மைச் சார்ந்தவைகள் அனைத்தும் அதாவது பத்தில் ஒன்று மாத்திரமல்ல மொத்தமும் அவருடையதாகிவிட்டன, நாம் அவர் வசிக்கும் ஆலயமாகிவிட்டோம் என்பதே சத்தியம். ஆலயத்தின் வசமிருக்கும் அனைத்தும் ஆண்டவருக்கே சொந்தம் என்ற இந்த சிந்தையிலிருந்து நாம் விலகியிருப்போமென்றால், அனனியா சப்பீராளைப் போல சத்துருவினால் வஞ்சிக்கப்பட்டவர்களாகவே நாம் வாழ்ந்துகொண்டிருப்போம்.  

அனனியா என்னும் பேருள்ள ஒருவனும், அவனுடைய மனைவியாகிய சப்பீராளும் தங்கள் காணியாட்சியை விற்றார்கள். தன் மனைவி அறிய அவன் கிரயத்திலே ஒரு பங்கை வஞ்சித்துவைத்து, ஒரு பங்கைக் கொண்டுவந்து, அப்போஸ்தலருடைய பாதத்திலே வைத்தான் (அப் 5:1,2); அவன் வஞ்சித்து வைத்த ஒருபங்கை அனுபவிப்பதற்குக் கூட அவர்களுக்கு உயிரில்லாமல்போயிற்றே. 

'என் நேசர் என்னுடையவர், நான் அவருடையவள்' (உன் 2:16) என்று மணவாளன் மணவாட்டி என்ற ஒப்பந்தத்திற்குள் வந்தபின்பு, என்னுடையது உன்னுடையது என்று சொல்லிக்கொள்வதில் என்ன அர்த்தம்? அது இன்னமும் இருவரும் பிரிந்து வாழ்வதையே சுட்டிக்காட்டுகின்றது. அது, 'அவர்கள் ஒரே மாம்சமாயிருப்பார்கள்' (ஆதி. 2:24) என்ற சத்தியத்திற்கு விரோதமானது.  'நாங்கள் சவதரித்திருக்கிற இந்தப் பொருள்கள் எல்லாம் உமது கரத்திலிருந்து வந்தது; எல்லாம் உம்முடையது' (1 நாளா. 29:16) என்ற நிலைக்கு நாம் கடந்துவரவேண்டுமே. 

அவர்களெல்லாரும் தங்கள் பரிபூரணத்திலிருந்தெடுத்துப்போட்டார்கள்; இவளோ தன் வறுமையிலிருந்து தன் ஜீவனத்துக்கு உண்டாயிருந்ததெல்லாம் போட்டுவிட்டாள் (மாற் 12:44) என்பது, மணவாளனுக்காக உயிரையே கொடுத்துவிட வந்த மணவாட்டியாகவே அந்த விதவையைச் சுட்டிக்காட்டுகின்றது. 

ஆபிரகாம் எல்லாவற்றிலும் தசமபாகம் கொடுத்தான் (ஆதி. 14:20), தசமபாகம் என்பது யெகோவா கர்த்தருக்குக் கொடுப்பதற்கான ஓர் தொடக்கமே; யாக்கோபு செலுத்துவேன் என்று பொருத்தனை பண்ணிக்கொண்டான் (ஆதி. 28:22). அதை மாத்திரம் கொடுத்துவிடுவதால், 'அவருக்குக் கொடுப்பது முடிந்துவிடாது.' பரிசேயரே, உங்களுக்கு ஐயோ, நீங்கள் ஒற்தலாம் மருக்கொழுந்து முதலிய சகலவித பூண்டுகளிலும் தசமபாகம் கொடுத்து, நியாயத்தையும் தேவ அன்பையும் விட்டுவிடுகிறீர்கள்; இவைகளையும் செய்யவேண்டும், அவைகளையும் விடாதிருக்கவேண்டுமே (லூக் 11:42). தசமபாகம் மாத்திரமல்ல, எல்லா பாகமும் அவருடையதே என்ற அறிவு நம்மில் பெருகியிருந்தால், புசித்தாலும், குடித்தாலும், எதைச் செய்தாலும் அவருடைய நாமத்தின் மகிமைக்காகவே செய்ய நாம் நம்மை அர்ப்பணித்துவிடுவோம். 'ஊழியர்கள், போதகர்கள்' மாத்திரமே ஆசாரியர்கள் என்ற கண்ணோட்டத்தை விட்டுவிட்டு, கிறிஸ்துவை ஏற்றுக்கொண், இரத்தத்தினாலே பாவங்களற கழுவப்பட்ட நாம் ஒவ்வொருவரும் நம்முடைய பிதாவாகிய தேவனுக்கு முன்பாக இராஜாக்களும் ஆசாரியர்களுமாயிருக்கிறோம் என்ற சிந்தை நம்மில் வளரட்டும் (வெளி 1:6). 'தசமபாகம்' என்பது கொடுத்தலுக்கான ஓர் முளையே, அது வளர்ந்து மரமாகும்போது எல்லாம் அவருடையதாகவேண்டும். 

நீங்களோ, எவனாகிலும் தகப்பனையாவது தாயையாவது நோக்கி: உனக்கு நான் செய்யத்தக்க உதவி எது உண்டோ, அதைக் காணிக்கையாகக் கொடுக்கிறேன் என்று சொல்லி, தன் தகப்பனையாவது தன் தாயையாவது கனம்பண்ணாமற்போனாலும், அவனுடைய கடமை தீர்ந்ததென்று போதித்து, உங்கள் பாரம்பரியத்தினாலே தேவனுடைய கற்பனையை அவமாக்கிவருகிறீர்கள் (மத் 15:5,6) என்று சொன்னதைப்போல, கர்த்தருக்கு 'தசமபாகத்தை' மட்டும் கொடுத்துவிட்டு எல்லாம் முடிந்துவிட்டது என்று நினைத்துக்கொண்டிருக்கக்கூடாது; அது அவரை கனம்பண்ணாமற்போவதற்குச் சமமானதே. 

விடுதி ஒன்றில் நான் தங்கியிருந்தேன், அப்போது என்னைச் சந்தித்த வாலிபன் ஒருவன், 'அண்ணன், நீங்க தசமபாகம் கொடுக்கிறீங்களா?' என்று கேட்டான்; 'என்னையே கொடுத்துவிட்டேன், என்னுடையது எல்லாம் அவருடையது, இதில் எனக்குரியது அவருக்குரியது என்று நான் பிரித்துப் பார்ப்பதில்லை; நானும் அவரும் ஒரே சரீரம்' என்று பதில் சொன்னேன்.  

அனைத்தும் கிறிஸ்துவுக்கே 

எந்தன் அனைத்தும் அர்ப்பணமே 

என் முழு தன்மைகள் ஆவல்களும் 

அனைத்தும் கிறிஸ்துவுக்கே என்பதே பாடலாகட்டும்.