பச்சை குத்திக்கெர்ளளலாமா?

 

போகுமிடமெல்லாம் போலியாகவே மனிதர்களோடு ஒட்டிக்கொள்ள விரும்புபவன் சாத்தான். 'தேவ ஆட்டுக் குட்டியாக (யோவான் 1:36) இயேசு வந்தார்' அந்த உருவத்தையே அந்திக்கிறிஸ்துவுக்கு (baphomet) அடையாளமாக்கிக்கொண்டான் சாத்தான். 'தேவன் ஒளியாயிருப்பதால்' (1யோவான் 1:5) அவனும் ஒளியின் வேஷத்தைத் தரித்துக்கொண்டான் (2 கொரி. 11:14). 'பிரகாசமுள்ள விடிவெள்ளி நட்சத்திரமுமாயிருக்கிறேன்' (வெளி. 22:16) என்று அவரைக் குறித்தும், 'அதிகாலையின் மகனாகிய விடிவெள்ளியே' (ஏசா. 14:12) என்று அவனைக் குறித்தும் வேதம் வேறுபிரித்துக் காட்டிக்கொடுக்கிறதே. 

'பெருமூச்சுவிட்டழுகிற மனுஷரின் நெற்றிகளில் அடையாளம் போடு' (எசே 9:4) என்றார் ஆண்டவர்; ஆபேலைக் கொலை செய்த காயீன், தண்டனைக் குறியவனாக இருந்தபோதிலும், உயிரை தப்புவிப்பதற்காகவே அவனுக்கு அடையாளமிட்டார் ஆண்டவர். ஆனால், சாத்தானோ, 'அழிந்துபோகிறவர்களை அடையாளமிட்டான்' (வெளி. 13:16-18). சாத்தானின் முத்திரையைத் தரித்தவர்களையும் அதின் சொரூபத்தை வணங்கினவர்களையும் மோசம்போக்கின கள்ளத்தீர்க்கதரிசியும் கந்தகம் எரிகிற அக்கினிக்கடலிலே உயிரோடே தள்ளப்பட்டார்கள் (வெளி 19:20). பாதாளக்குழியிலிருந்து புறப்பட்டு வந்த வெட்டுக்கிளிகளுக்கு, தேவனுடைய முத்திரையைத் தரித்திராத மனுஷரை மாத்திரம் சேதப்படுத்த உத்தரவு கொடுக்கப்பட்டது (வெளி. 9:4). மிருகத்திற்கும் அதின் சொரூபத்திற்கும், அதின் முத்திரைக்கும், அதின் நாமத்தின் இலக்கத்திற்கும் உள்ளாகாமல் ஜெயங்கொண்டவர்கள் தேவ சுரமண்டலங்களைப் பிடித்துக்கொண்டு' (வெளி.15:2) நின்றார்கள்; தேவனைப் புகழ்ந்து பாடிக்கொண்டிருந்தார்கள். 

அவருடைய நாமம் அவர்களுடைய நெற்றிகளில் இருக்கும் (வெளி 22:4, 14:1) என்பது தேவனது விருப்பம்; பசும்பொன்னினால் பட்டத்தைப் பண்ணி அதில் 'பரிசுத்தம்' என்றெழுதி ஆரோனை நெற்றியில் தரித்துக்கொள்ளச் செய்தார் கர்த்தர் (யாத். 28:36-38). ஆனால், மேலும், இரகசியம், மகா பாபிலோன், வேசிகளுக்கும் பூமியிலுள்ள அருவருப்புகளுக்கும் தாய் என்னும் நாமம் அவள் நெற்றியில் (வெளி 17:5) எழுதியிருக்கும்படி அநேகரை அபகரித்துக்கொண்டான் சாத்தான். 'சரீரம் மண்ணுக்கு' என்பதையே அழுத்திச் சொல்லி, மண்ணுக்கு போவதற்கு முன் அது 'விண்ணவரின் ஆலயம்' என்பதை மறந்துவிட்டனர் பலர். மனம் மட்டுமல்ல மயிருங்கூட எண்ணப்படுகிறது (மத். 10:30) என்ற அறிவு அவசியமானதல்லவோ. 

கைகளினால் கட்டப்பட்ட ஆலயத்தையே ஆலயம் என்றும், சரீரத்தையோ தேவனுடைய ஆலயமாக பாவிக்க மறந்துவிடுவோரும் அநேகர். கைகளினால் கட்டப்பட்டதற்கு அல்ல, இரத்தத்தினால் கழுவப்பட்ட சரீரமாகிய ஆலயத்திற்கல்லவோ முக்கியத்தும் கொடுக்கப்படவேண்டும். கைகளினால் கட்டப்பட்டதை பரிசுத்தமாக வைத்துக்கொண்டு, சரீரமாகிய ஆலயத்தை அருவருப்பாக்கினால் அடிக்கப்பட நேரிடும். அவருடைய வீட்டை கள்ளர் குகையாக்கவேண்டாம். நிழழாட்டமானதை பிடித்துக்கொண்டு, நிரந்தரமானதை இழந்துவிடவேண்டாம். ஒருவன் தேவனுடைய ஆலயத்தைக் கெடுத்தால், அவனைத் தேவன் கெடுப்பார்; தேவனுடைய ஆலயம் பரிசுத்தமாயிருக்கிறது; நீங்களே அந்த ஆலயம். (1கொரி 3:17) 

நாம், பரிசுத்த ஆவியால் அவருக்குள் முத்திரை போடப்பட்டிருக்கிறோம் (எபே. 1:13). சேனைகளின் கர்த்தர் சொல்லுகிறார்: செயல்த்தியேலின் குமாரனாகிய செருபாபேல் என்னும் என் ஊழியக்காரனே, உன்னை நான் அந்நாளிலே சேர்த்துக்கொண்டு, உன்னை முத்திரை மோதிரமாக வைப்பேன் என்று கர்த்தர் சொல்லுகிறார்; நான் உன்னைத் தெரிந்துகொண்டேன் என்று சேனைகளின் கர்த்தர் உரைக்கிறார் என்று சொல் என்றார் (ஆகா 2:23). மற்றவர்களை முத்திரையிடும் மோதிரங்கள் நாம் என்கிறது வேதம். அப்படியே, சாத்தானைக் குறித்தும், 'நீ விசித்திரமாய்ச் செய்யப்பட்ட முத்திரை மோதிரம்' (எசே. 28:12) என்று வாசிக்கிறோமே. இதையே யோயாக்கீமின் கோனியாவுக்கும் சொல்லி எச்சரித்து எதிர்த்து நிற்கிறார் (எரே. 22:24). ஆண்டவருடையதையும், சத்துருவினுடையதையும் வேறுபிரித்து கண்டுகொள்ளக்கூடிய அறிவு தேவை. பாவங்களில் பறிகொடுத்துவிட்டால், 'இந்த முத்திரை மோதிரமும் இந்த ஆரமும் இந்தக் கோலும் யாருடையவைகள் பாரும்' என்று (ஆதி 38:25) விலையுயர்ந்ததை விட்டுவிட்டுச் சென்ற யூதாவை தாமார் பிடித்ததுபோல நாமும் பிடிபட்டுவிடுவோம். யூதர்களைக் கொன்று குவித்த ஹிட்லர், ஜனங்களுக்கு அடையாளமிடும் வழக்கமுடையவனாயிருந்தான். 

'உன்னதமானவருக்கு ஒப்பாவேன்' (ஏசா. 14:14) என்ற எண்ணத்தில், போலியாகவே வலம் வரும் அவனது விளையாட்டுக்களில் வீழ்ந்துபோகாதபடிக்கு கவனமாயிருப்போம். செத்தவனுக்காக உங்கள் சரீரத்தைக் கீறிக்கொள்ளாமலும், அடையாளமான எழுத்துகளை உங்கள்மேல் குத்திக்கொள்ளாமலும் இருப்பீர்களாக; நான் கர்த்தர் (லேவி 19:28) என்ற கட்டளை நமக்கு உண்டு. காதலர்கள், நடிகர்கள், அரசியல் தலைவர்கள் போன்றவர்களின் பெயர்களை பச்சை குத்தினவர்களாக அவனது வசத்தில் வைக்கப்பட்டிருக்கும் வாலிபர்கள அநேகர் உண்டே. நிரந்தரமானதாக அவைகள் இருப்பினும், மனந்திரும்புதலினால் அவைகளை நிக்கிரகம் பண்ணமுடியும். பச்சை குத்திக்கொள்ளுதல், பரிசுத்த குலைச்சலே